Днесь ся стало епохалноє дійство – у выдавництві «РІК-У» выйшла зберька «Казкы з телевізора»…
Днесь ся стало епохалноє дійство – у выдавництві «РІК-У» выйшла зберька «Казкы з телевізора», в котруй зобрані 80 казок народув світа, які знамна карпаторусинська cпівачка Олґа Прокоп у 2019 роци розказовала діточкам у рамках телевізійного проєкта Першого кабелного канала «Вечірня казка».
Идея издати книжку з казками на русинськум языку появила ся не днесь. Щи у 2019 рокови, коли была жыва Олґа Кириловна, патріарх русинського двиганя Володимир Біланин предложив издати казкы по-русинськы, а Стас Ганькович дав слово се вшытко профінансовати.
Тому після выхода сього літа у світ «Русинськых співанок», быв зобраный рокаш єднодумцюв во главі з онучков прощеної бы Олґы Кириловны – Наталійов Симчик. Туда зайшли Юрій Шипович, Анна Меґела, Станіслав Ганькович, Иван Архій. Робота была поділена меже собов: редакційов книжкы заняли ся Юрія Шипович й Анна Меґела, илюстрацію на убкладинці зобразив Иван Архій. Сама книжка выйшла за повної фінансової пудпоры Станіслава Ганьковича. У книжці, ги илюстрації до казок, схосновані малюнкы малинькых чинадійовцюв – Симчик Дарины, Чопея Владислава, Васько Віталіны, Ілічек Кіры, Кучінкы Наталії, Тюшкы Ангеліны, Йовбак Дарины, Софілканич Марії, Мигович Софії, Добош Марії, Лаєр Марії, Мущинкы Насті, Агапова Михаила, Ложечника Вадима.
Казочкы, записані й ушорені прощенов бы Олґов Кириловнов, не лем вчать діточок рудному слову, а и научавуть їх быти чесныма, порядныма, благыма.
Тому, честованый читателю, любуй ся русинськым печатным словом.
Учи діточок, внукув, правнукув свому.
Говори, пиши и читай по-русинськы.
Своє тями й честуй!
