4 септембра русини Закарпаття нащивили могилу легендарної русинської співачкы Ольги Прокоп
Днесь, 4 септембра, члены карпаторусинськых сосполных організацій «Русин-Клуб» й «Наохтема в рокаши» вєдно з русинськым діточым ансабльом «Бабчина співаночка» нащивили могилу легендарної русинської співачкы, зберачкы русинскых балад и співанок Олгы Кириловної Прокоп (1940-2020).
Позад сього русинські активісты нащивили й репетицію діточого ансамбля «Бабчина співаночка», котрый не зопер своє фунгованя из смертьов Олгы Кириловної. Роботу з діточками продовжила єї внучка Наталія Симчик.
Новый керовник ансамбля и його учасникы у перерывах меже співами розказовали гостям про свої будні: дітськый рокаш не лем жиє, айбо и поповнює ся учасниками, реанімує старі карпаторусинські співанкы, веде фейсбушну сторонку под єднойменнов назвов. Так ги высказав ся член «Русин-Клуба», професор УжНУ Маріан Токар: «Автентичну співанку майже вже нигде не вчуєш. Тому «Бабчина співаночка» у сьому плані є унікалнов, а и має жити дале».
Трудности у сього колектива суть тоты, што й у многых другых хоровых и гудацькых рокашув: ковід и во́йна почти поралізовали роботу, обмежили заграничні турне. «Майбулшов проблемов лишило ся ото, што держава так і не фінансує наш діточый ансамбль. Є й меценаты, котрі подпорувуть колектив (у першум шорі мож назвати хотя бы Станіслава Ганьковича), айбо такых мало», – вповіла нова керовниця ансамбля.
«Пройде щи пару рокув, и изглядателі будуть ходити по селах, абы учути карпаторусинськоє слово. А туй така збиралниця и сокотилниця народных співанок, у котрых сесі слова й зобрані. Треба лем мало подпоровати, и зробить ся велика робота», – акцентовав Михаил Куцкір.
Члены карпаторусинськых сосполных організацій «Русин-Клуб» й «Наохтема в рокаши» предложили ансамблю нащивити раненых воякув Мукачовського госпіталя. Пообіцяли, што будуть подпоровати «Бабчину співаночку», се унікалноє творінню Душі Карпат – Олгы Кириловної Прокоп.
