9 октовбра, пиля памнятника Євгенію Фенцику в Ужгороді одбыла ся презентація книжкы “Творы” Євгенія Фенцика
9 октовбра, пиля памнятника Євгенію Фенцику в Ужгороді одбыла ся презентація книжкы “Творы” Євгенія Фенцика.
Книжка выйшла у Пряшові в 2021 роци, айбо презентація на Подкарпатю запоздила ся з вшилякых причин, перша з котрых – война в Украйині.
Презентовав книжку русинськый ученый, кандидат філологічных наук, выкладач Пряшовського універзитета, єден з єї ушорювачув Валерій Падяк, котрый розказав про то, як они з Міхалом Павлічом (другым ушорювачом книжкы, молодым ученым з Пряшова) дарабчиками збирали по старуй періодици, архівах и бібліотеках драму “Покореніє Ужгорода” й повісти “Учитель-Неборак” й “Нищіє духом”. Теперь сесі творы з вічныма проблемами патріотизма й ренегацтва суть доступныма читателю.
На презентації были кандидаты ист. наук М. Зан и П. Леньо, заслуженый учитель Украйины И. Ситарь, знамні русинські медійникы Віра Кобулей и Константин Тимофеев , члены “Русин-Клуба” й голова Клуба Т.Г.Масарика в Ужгороді Иван Латко, студенты УжНУ й симінаристи Богословської академії им. Теодора Ромжі.
