У адміндомі с. Голубине одбыла ся презентація книжкы «Голубине і голубинці» Маргариты Безик
15 юлія у адміндомі с. Голубине одбыла ся презентація книжкы «Голубине і голубинці» Маргариты Безик, днесь уже прощеної бы. Маргарита Ивановна робила над книгов довгі рокы, а вже після єї смерти до логічного кунця довела сю роботу дочка Авторкы – Иванна Дюлай. Так, щи у минулому, 2022 роци, в Кийиві, у ТОВ «Видавничий дім АВМ», выйшла обємна, на 600 бокув, исторія карпатського села «Голубине і голубинці».
На презентацію прийшли многі честовалникы прощеної бы Авторкы. Се и єдноселчане, и представникы адміністрації Полянської ТГ, и сященник Голубинської греко-католицької церьковли Успіння Пресвятої Богородиці Иван Козар, цімборове Ювіляркы и тд. Были кликаныма на презентації и члены “Русин-Клуба” Маріан Токар, Петро Габрин, Микола Рішко, Юрій Шипович.
Выступавучи , Маріан Токар, директор Научно-изглядателськый институт політичної регіоналістикы Ужгородського націоналного універзитета, доктор наук з державного управліня, кандидат историчных наук, заступник головы сосполної організації «Русинськый културологічный клуб», подкрестив велику важность написаня локалных исторій сел нашого края, подмітивши, же з такых исторій и складать ся дале велика исторія Подкарпатя. Маріан Юрійович вповів: «Подовж послідных 150 рокув Подкарпатя входило до складу дакулкох державных и полудержавных утворень. Се унікалный трафунок не лем в Украині, а и в Європі. Тому подкарпатци й выробили у собі тот тип комунікабелного и толерантного челядника, котрый шіковно ся подштемовує под нові реалії, при тому избігавучи насильства й агресій».
Члены «Русин-Клуба» вручили сімї Маргариты Безик и місному фолк-ансамблю «Голубинська борона» у подарок книгы «Русинські співанкы» зобрані Олгов Прокоп и новый номер културно-белетристичкого журнала «Отцюзнина».
