ТРЕТЯ ПРЕЧИСТА СТУПАЄ – ЗЕМЛЮ СНІГОМ ПОКРИВАЄ (на карпаторусинській мові)
(За книгов Юрія Чорія «Ой роде наш красний…обрядово-звичаєві традиції Закарпаття»)
Сято Введеня припадать на 4 децембра.
Називать ся щи Введеньом у Храм Пресятої Богородиці, вадь – Третя Пречиста (Перша Пречиста – Успеня Пресятої Богородиці, 28 августа, Друга Пречиста – Руздво Пресятої Богородиці, 21септембра).
У сесь день, за сохташом, Бог пущать праведні душі побзерати на своє тіло, бо, лем у сесь день душа наділяє ся такыма можностями – «на землі побывати, своє тіло повидати».
В народі придержовали ся думкы: до Введеня дівкы й жункы мали потерти коноплі и льон, бо тко тре пузніше сього сята, тот накличе бурю на поля, а на себе – нечестованя людий. Вірили такой, што землю мож копати лем до Введеня, бо потому аж до Благовіщеня (7апріля) «земля спочивать, на літо сил ся набирать».
Після Введеня и до девятого четверя після Руздва газдыням не позво-ляло ся райбати пралков, бо, гибы, тим мож накликати вліті градову бурю на поля, яка побє вшиток урожай.
Десь по селах на Введеня ходили полазникы, вінчовучи серенчу, як на Новый рук ци на Бабин вечур. Першым полазником-вінчовалником, за сохташом, мала быти особа чоловічої статі. Тлумачили так: кедь прийшов молодый фатьов – на серенчу й здоровля, кедь старшый, хворый ци бідный – на несеренчу: хвороту и худобность. Майгурше было, кедь першов приходила дівка вадь стара жунка – такым ламали на голові хліб-полазник и гнали з хыжи.
Не обходила ся Третя Пречиста (Введеня) и без традиційної ворожбы. Ворожили водов з трьох поточкув, котру набирали попувночи. Были й такі, што находили коноплю-самосійку и попувночи, зверши з себе шатя, сідали на сінешный поруг и терли клоча, «абы коноплі и лен пушли на хосен», а именно – жебы за зиму «много напряло ся й наткало ся».
На Введеня часто залітає сніг, тому казали: «Третя Пречиста ступає – землю снігом покриває». А щи приповідали: «На Введіня – обледеніня», «Яка погода на Введеня – така й ярь буде», «Кедь Введеня мости збудує, а Микола (19децембра) заклинцює – зима довго полютує». «Кедь на Введеня водяно вранці – буде на яри молоко в довжанці», «Як прийшла Третя Пречиста – на деревах ани листа».
