У «ПАЛАНКУ» НА СЯТУ МАРЮ БЫЛО ЧУТИ РУСИНСЬКЫЙ СПІВ, ВАДЬ «НАОХТЕМА В РОКАШИ»…ЗАГУЛИ (ФОТО, ВІДЕО)

28 августа в Мукачовському замку «Паланок» одбыв ся першый русинськый умілськый фестиваль «Наохтема в рокаши». Иніціатором дійства став  русинськый активіст-блогер Стефан Сікора, а організатором – Станіслав Ганькович при подпорі  Общества молодых подкарпатськых русинув (голова И.Крафчик). Вели сяткову програму Петро Куцкір и Лілія Немеш.

Фестиваль зачав Станіслав Ганькович, котрый поздравив участникув фестиваля й позерачув з сятом Успіня Пресятої Богородиці и пожедав вшиткым доброї дякы под час дійства.

Дале Юрій Шипович, голова «Русинського културологічного клуба» и    Юрій Продан, голова Общества им. А.Духновича презентовали свіжый номер «Алманаха днешньої русинської літературы». «Сесь номер присяченый Олзі Прокоп – легендарнуй русинськуй співачці,  «Душі Карпат».  Каждый учасник фестиваля дустане номер «Алманаха» у подарок», – вповів Юрій Продан.

Од СО «Народна рада русинов Закарпаття» учасникув фестиваля поздравив голова Євген Жупан.

Зачав сяткову програму дітськый русинськый ансамбль «Бабчина співаночка», якый быв созданый прощенов бы Олгов Кириловнов и на днесь керованый єї онучков Наталійов Симчик. За ним выступив бобовищанськый фолкльорный рокаш «Бабовка».

Дале выступили:

–  молода русинська солістка Ніколета Крафчик (Мукачово);

– Середнянськый народный аматорськый вокалный ансамбль “Руменок” й танцьовалный ансамбль «Гаклірка»;

– народный фолклорный колектив «Иршава»;

– Соліст кийивського театра «Ромен», побідитель меженародных фестивалюв Греції, Италії, Горватії, учасник украйинського Х – фактора, побідитель «Караоке на Майдані»  Йосиф Чава, (в. Иршава).;

– фолк-банд «Бетяры»;

– русинськый бард Антон Галас (Виноградово);

– исполнитель народных русинськых співанок Василь Січ (Виноградово);

– народний вокалный ансамбль «Арніка» (Холмківська ОТГ);

–  фолк-банд «Руснакы» (Мукачово);

– солістка Закарпатського народного хора Мирослава Копинець (Ужгород);

– знамный русинськый співак, учасник проекта Х-фактор Иван Крафчик (Мукачово).

Заперав концерт Народный артист Украйины, уроженець иршавського села Осой –  Иван Попович.

Подовж вшиткого концерта Тетяна Микита з Виноградова позовала на сцені в образі Музы «Алманаха днешньої русинської літературы» – символа невмирущости живого русинського слова, невмирущости русинської співанкы.

Юлія Шипович