Обвішованя ярлыками представителюв хоть-котрої нацменшинної сосполности є недопустимым
25. септембра, в УжНУ, на факултеті суспілных наук, пройшла научно-практична конференція на тему «Формат розвитку відносин України та країн Центральної Європи у контексті впливу гібридної війни, виборчих процесів та забезпечення прав національних меншин» з участьов колег з-за гатара. Конференція проходила в очно-заочному (онлайн) форматі.
У єї рамках прозвучали й три доклады, котрі ся тыкали русинської проблематикы. Так на пленарному засіданьови учасникы заслухали доклад кандидата историчных наук, доцента, докторанта кафедры політології й державного управліня ДВНЗ «УжНУ» Михаила Зана на тему «Особливості етноідентифікації та громацько-політичної репрезентації русинів у Словацькій Республіці та Україні (за результатами експертного опитування)». Изглядованя робили ся в Ужгороді, другых локаціях Закарпатської области й Пряшововському крайи Словакії. Докладчик подкреслив: «Навішованя русинам ярлыкув «етнічні потворы», «етнічні маргиналы», удумованя й хоснованя некоректної термінології штодо хоть-котрої етнічної сосполноти є недопустимым».
На секційных засіданьох были заслухані ищи два доклады: головы Закарпатського обласного научно-културологічного общества им. А.Духновича Юрія Продана на тему «Громадська діяльність Товариства імені Олександра Духновича в минулому та сьогоденні» й головы СО «Русинськый културологічный клуб» Юрія Шиповича на тему «Особливості становлення та організаційного структурування Світового конгресу русинів».
В цілому, участь у научно-практичнуй конференції русинськых сосполных активістув была прийнята позитивно другыма учасниками, «русинські» доклады вызвали живый интерес и потягли за собов мотузок дебатув.
Такой, у рамках конференції, Шипович Юрій, голова СО «Русинськый културологічный клуб», Продан Юрій, голова Закарпатського обласного научно-културологічного общества им. А. Духновича и Сергієнко Тетяна, голова Закарпатського общества чеської културы нащивили Научну бібліотеку Ужгородського націоналного універзитета, де высоко оцінили багатство книгозборні УжНУ й подаровали «Алманах днешньої русинської літературы 2020», якый поповнив фонд одділа краєзнавчої літературы «Карпатика».
