Неділя, 27 травня 2018 16:17

26 мая у вариши Еґері пройшлов шоровый День русина

26 мая у вариши Еґері пройшлов шоровый  День русина
Се русинськоє націоналноє сято в Мадярщині проходить каждый рÿк у иншакому містови сьої державы. Праздник, котрый фурт організовує русинськоє самосправованя Мадярщины, и де збиравуть ся близь 700 участникÿв из 24 самосправных русинськых організацій Мадярщины, приязаный до 22 мая, дня, коли воставші селяне из сел Вары и Тарпы во главі из куруцом Томашом Есе заняли Берегово и зачитали посланя Ференца ІІ Ракоці.

До воставшых мадяр прикапчали ся рокаші воставшых русинÿв во главі з Михаилом Папом из Мукачова и Албертом Кішом из села Баркасова.

Фото Юрия Шиповича.

На праздник были закликані и гості из Подкарпатя: дітськый фолк-рокаш «Бабчина співаночка» во главі из Олгов Прокоп, русинськый дует «Червена ружа» у составі Олгы Прокоп и Лілії Немеш, а такой представителі подкарпатськых сосполных русинськых організацій Крайового общества Подкарпатськых русинов и общества им. Александера Духновича, меже котрыма были двоє школашÿв Реднік Віктор и Шипович Богдан, котрі, у рамках програмы МАН Украйины, изглядавуть житя и творчество Александера Духновича.

Зачалося сято праздничнôв літургійôв у Еґерськÿй базиліці, по чому вшитка церемонія была перенесена у просторы середньої школы при Універзитеті им. Карола Естергазія.

Фото Юрия Шиповича.

Дійство одтворив Віктор Крамаренко - голова вседержавного самосправованя Русинÿв на Мадярах, після чого вшиток зал проспівав гімн русинÿв днешнього Закарпатя «Подкарпатскіє русины».

Фото Юрия Шиповича.

Віра Ґіріц - посланкыня за Русинÿв у мадярськÿм парламенті, розказала про важну роль, котру зограли русины у востаниї куруцÿв, за што и были прозвані Ференцом ІІ Ракоці «Gens fidelissima» – найвірнішым племням (народом). Прийшов зобравшых ся русинÿв поздравити и Ласло Гобіш – пріматор (мер) вариша Еґер.

Фото Юрия Шиповича.

Дітськый фолк-рокаш «Бабчина співаночка» во главі из Олгов Прокоп, русинськый дует «Червена ружа» у составі Олгы Прокоп и Лілії Немеш исполнили перед мадярсько-русинськыма позерачами цілу концертну програму автентичныма русинськыма співанками и стихÿв русинськых поетÿв. Декотрі  співанкы подхватовав вшиток зал.

Фото Юрия Шиповича.

 

 

 

Фото Юрия Шиповича.

 

Закончило ся праздничноє дійство гімном русинÿв вшиткого світа «Я русин быв, єсм и буду».

Юрій Шипович

Оцініть матеріал!
(5 голосів)


Переглядів: 210

Авторизуйтесь, щоб мати можливість залишати коментарі

Нагадуємо Вам, що редакція видання не несе відповідальності за зміст матеріалів, які розміщені користувачами сайту.
Реклама